ҚМГ басшысы Аустрияның іскер топтарымен мұнай-газ саласындағы ықпалдастық перспективаларын қарастырды

«ҚазМұнайГаз» ҰК АҚ Басқарма төрағасы Асхат Хасенов Астана қаласында Аустрияның Федералдық экономика, энергетика және туризм министрлігінің бас хатшысы Северин Грубер бастаған бизнес делегациямен кездесті.

ҚМГ-ның Аустрия компанияларымен мұнай-газ саласындағы ынтымақтастығының негізгі мәселелері талқыланды. Атап айтқанда, делегация құрамында мұнай мен табиғи газды барлау және өндіру, газ сату, мұнай өңдеу, отын және мұнай-химия өнімдерін шығару бағытында қызмет ететін OMV AG энергетикалық тобының өкілдері болды.

ҚМГ мен OMV компаниялары арасындағы ықпалдастықтың перспективті бағыттары ретінде мұнай өңдеу кәсіпорындарын жаңғырту, қосылған құны жоғары мұнай-химия өнімдерінің өндірісін ұлғайту, энергияны тиімді пайдалану, өнеркәсіптік қауіпсіздік, жаңа технологияларды енгізу және цифрландыру мәселелері айқындалды.

Кездесу соңында тараптар өзара тиімді ынтымақтастықты кеңейтуге дайын екенін білдірді.

Анықтама:

OMV AG – 1956 жылы негізі қаланған энергетика және химия саласындағы ірі халықаралық компаниялардың бірі. Штаб-пәтері Вена қаласында орналасқан. Компанияның Аустрия, Германия және Румынияда мұнай өңдеу кәсіпорындары бар. Мұнай мен табиғи газды барлау және өндіру бағытындағы негізгі бөлімшелері Солтүстік, Орталық және Шығыс Еуропада, сондай-ақ Солтүстік Африка мен Таяу Шығыстың жекелеген елдерін қамтитын оңтүстік өңірде шоғырланған. OMV AG-ның химия бөлімшелері өз өнімдерін әлемнің 120-дан астам еліне жеткізеді.