Атырауда Газ сепарациялау кешеніне арналған пропан буллиттері жасала бастады

«АтырауНефтеМаш» ЖШС Теңіз кен орнында салынып жатқан Газ сепарациялау кешеніне (ГСК) арналған үш пропан буллитін әзірлеуге кірісті. Бұл - тазартылған пропанды одан әрі тасымалдау алдында қауіпсіз сақтауға арналған ірі габаритті ыдыстар. KMG PetroChem Басқарма төрағасы Диаз Диянов өндіріс алаңына барып, жұмыс барысымен танысты.

Бұған дейін зауытқа жалпақ металдың барлық қажетті көлемі жеткізілді. Бүкіл партия инспекциядан және кіріс бақылауынан сәтті өтті.

Қазіргі уақытта ыдыс корпустарын жасауға дайындық жұмыстары жүріп жатыр. Әр буллиттің ұзындығы 42,75 метр, диаметрі 7,5 метр, ал көлемі 1 808 текше метр.

ГСК жобалық қуаты жылына 1,6 млн тоннаға дейін этан мен 360 мың тонна пропан ала отырып, 9,1 млрд текше метр құрғақ газды өңдеуді көздейді. Пропан полипропилен өндіру үшін, ал этан полиэтилен өндіру үшін шикізат ретінде пайдаланылатын болады.

KMG PetroChem ГСК құрылысына отандық өндірушілерді тартуды қолдайды. Қазақстан кәсіпорындарында тапсырыстарды орналастыру жергілікті қамтуды дамытуға, отандық машина жасаудың құзыреттілігін нығайтуға және оның еліміздің ірі мұнай-газ химия жобаларына қатысуын кеңейтуге ықпал етеді.