Астанада ҚМГ-ның және ірі жанармай құю станциясы желілерінің өкілдері кездесу өткізді

Жиында қыс мезгілі қарсаңында дизель отынының сапасын бақылау мәселелері талқыланды. Ұлттық компанияның сарапшылары МЕМСТ 32511-2013 стандарты және КО ТР 013/2011 техникалық регламенті бойынша шығарылатын дизель отынының физикалық‑химиялық сипаттамаларын егжей-тегжейлі түсіндірді, сондай-ақ бөлшек сауда желілеріне отынды сақтау мен паспорттау тәртібін қатаң сақтауды ескертті. Мұнай базасының резервуарында немесе цистернада қалған жазғы отынның аз мөлшердегі қалдығының өзі жаңа партиямен араласқан кезде оның құрамын ірі парафиндерге толтырады. Соның салдарынан отынның зауытта қамтамасыз етілген суыққа төзімді қасиеті төмендейді. Бұл ретте жанармай құю станциясы желілері отынға қосымша қоспаларды енгізгенде жаңа сапа паспортын беруі керек.

Еске сала кетейік, биыл қыркүйек айының ортасында өткен отырыста өңдеу көлемдерін сақтау және ҚР ішкі нарығында тапшылықты болдырмау үшін отандық үш зауытты - «Атырау мұнай өңдеу зауыты» ЖШС, «Павлодар мұнай-химия зауыты» ЖШС және «ПетроҚазақстан Ойл Продактс» ЖШС-ын ДТ‑Е‑К4 маркалы маусымаралық дизель отынын өндіруге кезең-кезеңімен шығаруы бекітілді.

Қазан айының біріне дейін барлық үш мұнай өңдеу зауыты −15°C-тан жоғары емес мақсатты көрсеткішке қол жеткізді. Сонымен қатар зауыттар стратегиялық және өндірістік кәсіпорындардың қажеттіліктері үшін сүзгіштігі −26°C пен −38°C аралығында аязға төзімді қысқы отын маркаларын да өндіреді.

Кездесу соңында тараптар күз‑қыс маусымында күнделікті үйлестіру жұмыстарын жалғастырып, отын сапасына зертханалық бақылауды барлық кезеңде үздіксіз жүргізуге келісті.