Құрметті акционерлер, инвесторлар, әріптестер және серіктестер!
Компания беретін жыл сайынғы есеп тұрақты даму саласындағы прогресс туралы хабарлама болып табылады. Осы бағытты жақтайтынымызды растай отырып, біз акционерлер мен инвесторларларымыздың, қызметкерлер мен серіктестеріміздің, орналасқан өңірлердегі тұрғындардың, сондай-ақ тұтастай алғанда Қазақстанның мүдделеріне жауап беретін стратегиялық мақсаттарды іске асыруды жалғастырамыз. Компанияның ESG саласындағы қызметін жылдан жылға жақсартуға ұмтылуды назардан шығармаймыз.
Біз «Өндірістің көміртегі қарқындылығының тұрақты дамуы және үдемелі төмендеуі» стратегиялық мақсатын дәйекті түрде іске асырудамыз. Осы мақсатты қолдау үшін ҚМГ «2022–2031 жылдарға арналған төменгі көміртектік даму бағдарламасын» бекітті. Компания климаттың өзгеруіне қарсы жалпы әлемдік күреске үлес қосу үшін заманауи үнемдеу технологияларын енгізу және көміртегі ізін азайту мақсатын көздейді.
Жылымық газдар шығарындыларын азайту және жаңартылатын энергия көздері саласындағы бірлескен жобаларды іске асыру бойынша жұмыстар белсенді жүргізілуде. Біз Total Eren-мен қуаты 1 ГВт құрайтын «Мирный» жел электрстанциясының құрылысына арналған жұмыс құжаттамасын әзірлеуді бастадық. Ағымдағы жылы Eni-мен гибридтік электростанцисының құрылысын бастау жоспарлануда. Бұл қадамдар біздің тұрақты даму және тиімді, таза энергетикалық инфрақұрылымды құру саласында алға жылжуға дайындығымызды көрсетеді.
Өз принциптерімізді жалғастыра отырып, біз экологиялық іс-шараларды іске асыру мәселелеріне ерекше назар аударамыз, бұл қоршаған ортаға әсерді азайтуға мүмкіндік береді. Бірқатар экологиялық көрсеткіштер бойынша оң динамика байқалады: шикі газды кәдеге жарату үлесі 98,9 %-ға жетті, кәдеге жаратылған тарихи қалдықтардың көлемі 1 145 мың тоннаға дейін өсті. Атмосфералық ауаға ластаушы заттардың шығарындыларын азайту, су ресурстарын пайдалану тиімділігін арттыру бойынша іс-шаралар орындалуда.
Жұмыскерлерге қамқорлық жасау біздің қызметіміздің маңызды аспектісі болып табылады. 2023 жылдың қорытындылары бойынша Компанияда 49 мың жұмыскер бар. ҚМГ мен «Abu Dhabi Ports Company» (ADP) арасындағы стратегиялық серіктестік туралы келісімнің шеңберінде Маңғыстау және Түркістан өңірлерінен келген қазақстандық мамандарды ADP-ға жұмысқа орналастыру бойынша бастама іске асырылды.
ҚМГ тобында жұмыскерлердің мүдделерін қорғайтын 42 кәсіптік одақ ұйымы жұмыс істейді. Басшылық неғұрлым өзекті мәселелер бойынша ЕТҰ кәсіподақтарымен тоқсан сайын кездесулер өткізеді. Жұмыскерлердің еңбек жағдайларын жақсарту және демалысы үшін әлеуметтік-тұрмыстық инфрақұрылымның жаңа объектілерін салу және жұмыс істеп тұрғандарын күрделі жөндеу бойынша жұмыстар жүргізілуде.
Сонымен қатар, біз орналасқан аймақтарды дамыту және қайырымдылық мәселелеріне назар аударамыз. Жер қойнауын пайдалануға жасалған келісімшарттар шеңберінде 5 миллиардтан астам теңге әлеуметтік жобаларды іске асыруға бағытталды. «Жарқын болашақ» жобасы бойынша ҚМГ Маңғыстау облысының 449 жоғары сынып оқушысының білім беру гранттарына 678 млн теңге бөлді. Балаларға толық өтеусіз қаржылық көмек көрсетіледі, оған оқу, жатақханада жату ақысы, көлік қызметтері шығындары және ай сайынғы стипендиялар кіреді.
2023 жылы ҚазМұнайГаз компаниялары тобында «KMG-Volunteer» еріктілер қозғалысы басталды. Еріктілер мұқтаж жандарға көмек көрсету, сондай-ақ әлеуметтік және экологиялық бастамаларды қолдау арқылы белсенді үлес қосуда.
Біздің қызметіміздегі маңызды басымдық өндірістегі қауіпсіздіктің жоғары деңгейін қамтамасыз ету, жұмыскерлердің өмірі мен денсаулығын қорғау болып табылады. Есепті кезеңде еңбек қызметіне байланысты жазатайым оқиғалардың салдарынан зардап шеккендердің саны өткен жылмен салыстырғанда 19 %-ға төмендеді. Сонымен бірге, өндірістік жарақаттанудың төмендеуіне қарамастан ҚМГ тобы мен мердігерлік ұйымдардың жұмыскерлері арасында адам өліміне әкеп соқтырған жазатайым оқиғалар орын алды. Біз қауіпсіздікті күшейту және осындай оқиғаларды болдырмау бойынша жүйелі шаралар қабылдаудамыз.
Инвестициялық және инфрақұрылымдық жобаларды іске асыруды жалғастыра келе, Жақсартылған модельдік келісімшарттың тетігі көмегімен біз «Қаламқас теңіз – Хазар», «Қаратон тұзасты» және «Ұрықтау» сияқты капиталды қажет ететін және күрделі жобалардағы жұмыстарды жандандыруға қол жеткіздік.
Есепті жылы Компания өзінің өндірістік көрсеткіштерінің оң динамикасын көрсетті. Brent маркалы мұнайға орташа бағаның төмендеуіне қарамастан, есепті кезеңдегі таза кіріс 924 миллиард теңгені құрады. ҚМГ 1 162 миллиард теңгеге салықтар және бюджетке төленетін басқа да міндетті төлемдерді төледі. ҚМГ тобында жеткізілген тауарлардың, жұмыстар мен қызметтердің жалпы көлемі 2,186 миллиард теңгені құрады, біздің сатып алуымыздағы елішілік құндылықтың үлесі 77%-ды құрады.
Біз үшін өндірістік және қаржылық нәтижелерге қол жеткізу және қызметімізде әлеуметтік және экологиялық аспектілерді ескеру маңызды екенін атап өткім келеді. Біз осы жолмен ғана болашақта компаниямыздың сенімді және тұрақты дамуын қамтамасыз ете алатынымызға сенімдіміз.
2023 жыл ішінде тұрақты дамуға қол жеткізу бастамалары халықаралық алаңдарда белсенді талқыланды. Экология және климаттың өзгеруі, адам құқықтары мен еңбек қатынастары, гендерлік теңдік және сыбайлас жемқорлыққа қарсы күрес мәселелері СОР28, БҰҰ-ның Жаһандық шарты және басқа да халықаралық деңгейдегі кездесулерде басым мәселелер болып табылды. Біздің Компания осы іс-шараларға белсенді қатысады және барлық көрсеткіштер бойынша Компанияның тұрақты дамуына қол жеткізуде жыл сайынғы прогресті көздейміз.
Біз ұзақ мерзімді перспективада тұрақты және жауапты бизнес құра отырып, әрбір бизнес процесіне ESG-кодымызды енгізіп, уақыт талаптарын орындаудамыз. Болашақта бұл бізді ҚМГ жұмысының барлық бағыттары бойынша жақсартылған көрсеткіштерге және тұрақты қаржылық нәтижелерге жетелейді.
Назарларыңыз және біздің компанияға сенімдеріңіз үшін алғыс білдіремін.
